వ్యాకరణం - సంధి కార్యములు
1. ఏకాదేశమనగా నేమి?
సమాధానం : మొదటి పదంలోని చివరి అచ్చును, రెండవ పదంలోని మొదటి అచ్చును పోయి వాటికి సమానమైన మరొక అచ్చు గాని లేక రెండవ పదము మొదటి అచ్చు (పరాచ్చు) గాని వచ్చుటను ఏకాదేశమందురు.
ఉదా: ఉదయ + అద్రి = ఉదయాద్రి
రాముఁడు + అతఁడు = రాముఁడతఁడు
2. ఆదేశమనగా నేమి?
సమాధానం : ఒక అక్షరమును తొలగించి వేరొక అక్షరము శత్రువు వలె వచ్చుటను ఆదేశమందురు.
ఉదా: అతఁడు + చేయ = అతఁడుసేయ
ఇందు "చ" కు "స" ఆదేశముగా వచ్చినది.
3. ఆగమమనగా నేమి?
సమాధానం : రెండు పదముల మధ్య మరొక అక్షరము మిత్రుని వలె అధికముగా వచ్చి చేరుటను "ఆగమము" అందురు.
ఉదా: పెంకు + ఇల్లు = పెంకుటిల్లు
ఇందు "ట ఆగమముగా" వచ్చినది.
4. నిత్యమనగా నేమి?
సమాధానం : విధించిన సంధి కార్యము తప్పని సరిగా వచ్చుటను నిత్యమందురు.
ఉదా: రామ + అయ్య = రామయ్య
5. విభాష(వైకల్పికము) అనగా నేమి?
సమాధానం : విధించిన సంధి కార్యము ఒకసారి వచ్చుటను మరొకసారి రాకపోవుటను విభాష లేక వైకల్పికము అందురు.
ఉదా: మేన + అత్త = మేనత్త, మేనయత్త
ఇందు సంధి జరిగినప్పుడు 'మేనత్త' గను, సంధి జరుగనపుడు యడాగమము వచ్చి 'మేనయత్త' గను మారినది.
6. బహుళమనగా నేమి?
సమాధానం : విధించిన సంధి కార్యము ఒకసారి నిత్యమగును, వేరొకసారి వైకల్పికముగను(విభాష), మరొకసారి అసలు రాకుండుటను, ఇంకొకసారి విధించిన కార్యమునకు బదులు వేరొక కార్యము వచ్చుటను బహుళ మందురు.
ఉదా: రామ + అయ్య = రామయ్య (నిత్యము)
పుట్టిన + ఇల్లు = పుట్టినిల్లు, పుట్టిన యిల్లు (విభాష)
వనిత + ఆమె = వనితాయమె (సంధి రాకుండుట)
ఒక + ఒక = ఒకానొక (అన్య విధము)
7. ఆమ్రేడితమనగా నేమి?
సమాధానం : రెండుసార్లు చెప్పబడిన పదములలో రెండవ పదమును 'ఆమ్రేడితము' అందురు.
ఉదా: ఔర + ఔర = ఔరౌర
ఇందు రెండవ 'ఔర' ఆమ్రేడితము
8. ద్విరుక్తమనగా నేమి?
సమాధానం : రెండుసార్లు చెప్పబడిన దానిని ద్విరుక్తమందురు.
ఉదా: ఓహో + ఓహో = ఓహోహో
ఇందు 'ఓహో' ద్విరుక్తము.
9. ద్విత్వమనగా నేమి?
సమాధానం : ఒక హల్లు క్రింద అదే హల్లు వచ్చిన ద్విత్వమందురు.
ఉదా: అక్క - ఇందు 'క్క' ద్విత్వము.
10. సంయుక్తము అనగా నేమి?
సమాధానం : ఒక హల్లుతో వేరొక హల్లు చేరిన 'సంయుక్తము' అందురు.
ఉదా: విద్య - ఇందు 'ద్య' సంయుక్తము.
11. సంశ్లేషమనగా నేమి?
సమాధానం : సంధి జరుగునపుడు మొదటి పదము చివరి హల్లు, రెండవ పదము మొదటి హల్లుతో చేరుటను సంశ్లేమందురు.
ఉదా: రామున్ + గొలిచెద = రామున్గోలిచెద. ఇందు ' న్గో' అనునది సంశ్లేషము.
12. లోపమనగా నేమి?
సమాధానం : అక్షరము లోపించుటను 'లోపము' అందురు.
0 comments:
Post a Comment