Potana Bhagawatam - Ksonitalambunan

పోతన భాగవతం - క్షోణితలంబునన్  

క్షోణితలంబునన్ నుదురు సోకగ మ్రొక్కి నుతింతు సైకత 

శ్రోణికిఁ జంచరీక చయ సుందరవేణికి రక్షితామర 

శ్రేణికి దోయజాతభవ చిత్త వశీకరణైక వాణికిన్ 

వాణికి నక్షదామ శుక వారిజ పుస్తక రమ్య పాణికిన్ 

తాత్పర్యము: నేలకు  నెన్నుదురు సోకునట్లు సాగిలపడి మ్రొక్కి సైకత శ్రోణీ, చదువుల వాణీ, అలినీలవేణీ అయిన వాణిని సన్నుతిస్తాను. ఆ చల్లని తల్లి ఒక చేతిలో అక్షమాలనూ, మరొకచేతిలో రాచిలుకనూ, ఇంకొకచేతిలో తామర పువ్వునూ, వేరొక చేతిలో పుస్తకాన్నీ ముచ్చటగా ధరిస్తుంది. సుధలు వర్షించే తన సుందర సుకుమార సూక్తులతో అరవిందభవుని అంతరంగాన్ని ఆకర్షిస్తుంది. తన కటాక్ష వీక్షణాలతో సుర నికరాన్ని కనికరిస్తుంది. 

Potana Bhagawatam - Aadara Moppa

పోతన భాగవతం - ఆదర మొప్ప మ్రొక్కిడుదు 

ఆదర మొప్ప మ్రొక్కిడుదు నద్రిసుతా హృదయానురాగ సం 

పాదికి దోషభేదికిఁ  బ్రపన్న వినోదికి విఘ్నవల్లికా 

చ్చేదికి మంజువాదికి నశేష జగజ్జన నంద వేదికిన్ 

మోదకఖాదికిన్ సమద మూషక సాదికి సుప్రసాదికిన్ 

తాత్పర్యము: హిమాచల కుమారి అయిన ఉమాదేవి మనస్సులోని అనురాగ సంపదను సంపాదించి, కలికల్మషాలను భేదించి, ఆపన్నుల విన్నపాలను ఆమోదించి, ఆశ్రితుల విఘ్నలతలను ఛేదించి, మంజుల మధుర భాషణాలతో అశేష భక్తులకూ విశేష సంతోషాన్ని ప్రసాదించి, నివేదించిన కుడుములూ ఉండ్రాళ్లు కడుపు నిండా ఆరగించి మూషకరాజును అధిరోహించి, ముల్లోకాలకూ మోదప్రదాయకుడైన వినాయకునకు కై మోడ్పులు ఘటిస్తాను.